WhatsApp foin fó sai aspetu foun ida-ne’ebé bele fasilita utilizadór sira uza 2 numeru telefone iha aplikasaun WhatsApp. Aspetu foun ne’e mak multi-konta, ne’ebé permite utilizadór sira atu uza konta rua iha telemovel ida iha tempu hanesan.
Aspetu ida-ne’e hahú lansa ba utilizadór balun ne’ebé rejistu ona ba WhatsApp beta tester. Beta tester sira ne’ebé download ona WhatsApp beta ba versaun 2.23.13.5 bele koko aspetu foun ne’e. Aspetu multi-konta permite utilizadór sira atu aumenta numeru WhatsApp ida tan ba aplikasaun ne’ebé hanesan.
WhatsApp nia utilizadór sira bele aumenta konta segundu iha aplikasaun liu husi loke Menu Setting no tuirmai buti ikon rama tun iha kódigu QR nia sorin. Depois ne’e, iha telemovel nia okos sei iha opsaun atu aumenta konta foun.
Prosesu atu aumenta konta foun ne’e hanesan baibain. Hatama de’it númeru telefone segundu ne’ebe ita hakarak uza, tuirmai hatama kódigu (OTP) ne’ebé manda liuhosi SMS, tuirmai hein prosesu sinkron to’o remata.
Se ita hakarak muda husi konta ida ba konta seluk, buti de’it iha menu vertikál tolu iha parte leten aplikasaun no hili “Switch Account”. Ita mós bele tama iha Menu Settings tuirmai klike iha ikon rama okos no hili konta ne’ebé ita hakarak loke. Bainhira ita aumenta konta foun, ida-ne’e sei kontinua nafatin iha ita-nia telmovel to’o taka tiha.
Agora ne’e aspetu multi-konta ne’e limitadu de’it ba konta WhatsApp rua iha aplikasaun ida. Nune’e mós, se konta segundu rejistu tiha ona iha telemovel seluk, konta ne’e sei logout no bele asesu de’it iha telemovel ne’ebé foin rejistu.
TelemovelAndroid balun mós oferese aspetu klone aplikasaun ida-ne’ebé dala barak uza atu klone aplikasaun WhatsApp sai rua iha telemovel ida. Agora utilizadór WhatsApp sira la presiza tan atu klone tanba sira bele aumenta konta diretamente iha aplikasaun ida de’it.
